-
Signering av konsolideringsavtale mellom Nordmørsmusea, Gjemnes kommune og Gjemnes historie- og museumslag. Frå venstre: Direktør Eigunn Stav Sætre, ordførar Knut Sjømæling og styreleiar Nils Martin Sæther. Foto: Gjemnes kommune.
Samme dag går kommunen og historie- og museumslaget inn som eigarar av Nordmørsmusea AS saman med dei andre kommunane, museumslaga og Møre og Romsdal fylkeskommune.
I samband med stifting av Nordmørsmusea AS 21. oktober 2022 vedtok Gjemnes kommune å utsette sak om kjøp av aksjer og konsolidering i det nye museumsselskapet. Gjemnes kommune og Gjemnes historie- og museumslag har no ferdighandsama saka, og gjort vedtak om å kjøpe sine aksjer og å inngå konsolideringsavtale med Nordmørsmusea AS.
Signering av denne avtalen markerer ei ferdigstilling av samlinga av Nordmørsmusea. Dei aktuelle kommunane, museumslaga og fylkeskommunen er medeigarar, og dei lokale eigarane av samling overfører ansvar for forvaltning og utvikling av nordmørsk kulturarv til det regionale museumsselskapet.
- Dette er ein stor dag for Nordmørsmusea, seier direktør Eigunn Stav Sætre. - Når Gjemnes no kjem med i regionsmuseet kan vi jobbe samla med nordmørsk kulturarv i heile det kulturhistoriske området, og det gler vi oss til å ta fatt på.
Også Gjemnes kommune og Gjemnes historie- og museumslag er nøgd med å gå inn i museumsamarbeidet.
Ordførar Knut Sjømæling og leiar i historie- og museumslaget Nils Martin Sæther er einige om at dette er eit viktig vedtak både for kommunen og for dei frivillige. - Vi vil no få betre moglegheit til å ivareta kulturarven i Gjemnes, til å vise han fram og til å formidle han, seier Sjømæling.