Ein liten spasertur frå sentrum i Surnadal finn du heimen til bygdediktar og lokalhistorieforfattar Hans Hyldbakk.
Frå tunet har ein vidt utsyn over breibygda i nedre Surnadal, akkurat slik Hans Hyldbakk (1898-2001) ville ha det då han bygde heimen sin her i si tid. Her oppe skreiv Hyldbakk sine 19 bind med slektshistorie og bygdebøker. Han ga også ut 11 diktsamlingar, den siste då han var 100 år. Mest kjent er nok Hyldbakk for diktet «Vårsøg», som han skreiv fredsvåren 1945. Sambygdingen Henning Sommerro har seinare tonesett diktet.
Hyldbakk fikk fleire utmerkingar for sitt arbeid, og fikk mellom anna Kongens fortenestemedalje i gull i 1994.
Kleiva vart bygd i 1938, og påbygd i 1953 med delar frå barndomsheimen, som då skulle rivast. Husa står slik dei gjorde då Hyldbakk flytta på aldersheimen på Skei i 1987.
Vi gjer oppmerksam på at vegen opp til Kleiva ikkje er beregna på biltrafikk. Er du avhengig av bil eller anna kjørety for å kome opp til Kleiva ber vi om de tek kontakt for evt. avtale om dette.
