Åsen bygdemuseum

Eit mangfald av historie

Museet er bygd opp på den gamle garden Åsen. Her kan du oppleve lokal kulturarv og historie innanfor eit stort mangfald av tema og uttrykk. I tid spenner samlinga frå 5000 år gamle helleristningar til kjøkenrevolusjonen på 1950-talet.

Ein stor del av museet er bygningssamlinga, der ulike typar tradisjonelle bygningar frå området er representerte. Museet har to freda bygningar: ei røykomnstue og eit stabbur med to tømmerkassar. Inne i hovudbygningane finn du små temautstillingar om lokalhistoriske emne og handverk av ulike slag.

Åsen har også ei historie som kommunalt pleieheim frå 1910 og fram til tidleg på 1970-talet. Dette var føregangaren til dagens sjukeheimar, og eit av få offentlege tilbod for pleietrengande i vår nære fortid. I denne perioden var garden forpakta bort og leverte varer til storkjøkenet, samstundes som bebuarane ved institusjonen deltok i gardsdrifta etter evne.

Museet gir innblikk i dei ulike epokane i historia på Åsen, og utstillingane og samlinga speglar ulike sider ved samfunnet, både lokalt og regionalt, gjennom tida.

Museet tilbyr omvisingar for grupper etter avtale, i tillegg til opne arrangement som blir kunngjorde under «Hva skjer?».

Besøk museet på eiga hand

Hugs at museumsområdet alltid er ope, også når utstillingane ikkje er tilgjengelege. Museet nyttar appen Kulturpunkt, som du kan laste ned gratis. Her finn du enkelt tekst, bilete og annan informasjon om dei ulike museumsbygningane ved hjelp av QR-kodar. Kan også brukast utan appen, så lenge telefonen din kan lese QR-kodar.

Skular og barnehagar

Museet tilbyr opplegg for barnehagar og skular i vår- og haustsemesteret. Alle tilbod som kan bestillast for skular, vil i løpet av våren 2026 bli tilgjengelege i oversikta over skuletilbod i Nordmørsmusea på heimesida.

Fleire opplevingar i området: Kavlvegen kultursti – tur med historisk forankring

I tilknyting til Åsen bygdemuseum finn du Kavlvegen kultursti med startpunkt ved museet. I det same området ligg ein kavlveg som er datert til 1160-talet. Ved å leggje treverk over myra kunne ein ferdast lett, sjølv der det var svært vått, og denne teknikken er vidareført på delar av turstien. Eit stykke av den nye stien er ein rekonstruksjon av den originale trestien som ligg bevart i myra, medan andre delar består av ein forenkla og modernisert variant med grusdekke.

Parkeringsplassar for turstien finn du ved innkøyringa til museet og på tilvist plass oppe forbi låven. HC-parkering og tilkomst til Kavlvegen kultursti finst òg frå Galtmettet, ved FV670, om lag 1 km frå Åsen bygdemuseum i retning Skei.

Turbeskriving frå begge startpunkta: klikk her.