Aktiv samhandling

Mål for 2025: Nordmørsmusea opplevast som ein truverdig, modig og aktiv samfunnsaktør.

Vi har i 2025 jobba med å vidareutvikle og forankre samspelet vårt med både frivillige og profesjonelle aktørar. Særleg har vi hatt fokus på å involvere partnarskapen vår i kommunar og museums- og historielag i samband med innflytting i Normoria. Vi har invitert til samlingar, omvisninger og møter for å understøtte opplevinga av at dette er eit hovudsete for heile museet. Hovudutstillinga vår er eit klart bilete på aktiv samhandling gjennom mange år med brei medverknad i planprosessen. 

Vi har gjennom innflytting i Normoria etablert nye samarbeid både med partnarskapen i huset, men også med andre aktørar ettersom vi no har betre høve til både å ta imot og å legge til rette for samhandling. Dette gjeld både profesjonelle kunstnarar, husflidslag, slektsforskningsorganisasjonar og mange andre.

Vi samhandlar også med andre museum og kunnskapsinstitusjonar, særskild innan arkiv, bygningsvern, kulturarv og kunst- og kulturfeltet. Vi har ei sterk forankring i tradisjonshandverk og handlingsboren kunnskap, og jobbar aktivt med å etablere nye og tilgjengelege arenaer i heile museet for tradisjonskunst, samtidskunst og formidling av immateriell kulturarv. Og vi har styrka fokuset vårt på samlings- og kunnskapsutvikling som base for samhandling, med ei tydeleg rollefordeling og ukompliserte avtalar.   

Vi har samarbeid med ulike kunstuttrykk, der mellom anna samarbeidet med In2it Dance Festival er eit direkte resultat av korleis kunstfeltet kan nyttiggjere seg nordmørsk kulturarv og arkiv i kreativ produksjon.   

Vi har fokus på publikumsutvikling gjennom marknadsføring, prosjektmedverknad, innspelsrunder og aktiv bruk av SoMe for å nå ut breidare og spissare. Særleg er vi oppteken av å nå ut til eit større og meir variert publikum og til grupper som tradisjonelt sett ikkje er museumsbrukarar.  

NMAS deltek i følgande museumsnettverk og NMF-seksjonar: Tradisjonshåndverk og bygningsvern, Kystkultur, Kulturlandskap, Musikk og Kvinnehistorie, Forskning, Industri, kommunikasjon og anlegg (SIKA). Vi er dessutan tilknytta Nettverk for arkeologiformidling, Forum for hagehistorie og Norsk Genressurssenteret. Vi er medlem av Norges museumsforbund og ICOM Norge.

Samling og samhandling

Det er særleg gjennom arbeidet vårt med samling at vi har jobba med å auke og styrke samhandlinga vår i året som gjekk. Vi har samarbeid med ulike museums- og historielag om både gjenstander og arkiv, noko vi har stort utbytte av som kunnskapsinstitusjon.

Vi har også jobba med å involvere dei frivillige og partnarskapen vår gjennom ulike møtepunkt. Mellom anna inviterte vi samtlege eigarar og samarbeidspartnerar til innflyttingsfest i Normoria i juni, og igjen til opningsarrangementa og opning av hovudutstilling i oktober. Vi opplever å ha ein aktiv og engasjert partnarskap, som ønsker å arbeide ilag med oss for å løfte både kulturarven og interessa rundt denne på tvers av heile regionen.

Kunnskap og kompetanse

Også i samband med arrangement, aktivitetar og kurs har vi tett og godt samarbeid med ulike aktørar. Eit døme på dette er samarbeidet med kulturskulen i Kristiansund der vi i fjor etablerte eit prøveprosjekt med støtte frå Norsk kulturskuleråd innan handverksfag. Frå nagl til færing er eit gruppebasert tilbod for barn i følgje med vaksne, der dei får prøve seg på handverk som smiding, treskjering og taufletting.

Vi jobbar også for å knytte til oss andre miljø og einskildpersonar med særkompetanse og kunnskap som vi har behov for, det vere seg gjennom samarbeid med andre museum, akademia eller øvrig samfunnsliv.

I 2025 hadde vi fleire store arrangement ved våre museum, dei fleste av desse er drivne av museumslag eller andre frivillige aktørar, slik som Jul i Vågen og Jul på Leikvin, Vikingemarknad, Olsokfeiring på Gamle Kvernes, Klippfiskens dag på Kråksundet sjøbruksmuseum og mange fleir. Dette er viktige arrangement for publikum og for oss, og opplevingar som vi sett stor pris på å kunne vere vertskap for. Også ved våre eigne aktivitetar og arrangement har vi mykje god støtte i både andre organisasjonar og einskildpersonar.